Бу ёрқин келажак учун тўлов эмас, бу ёмон ўтмиш учун чегирма! Тармоқда Ипотекабанкнинг OTP Bank'ка 330 млн.долларга сотилгани ҳақидаги инсайд твит айланмоқда. Бу қанчалар асосли маълумот, кўпми ё камми, бир нарса дейиш қийин. Чунки Ўзбекистонда фаол ва ликвид фонд бозори мавжуд эмас. Барча талабгорлар иштироки шароитида қандай нарх шаклланиши мумкин бўларди, буни фақат очиқ бозор шароитидагина билиш мумкин. Бунинг устига биз барча шартлар қандай эканини билмаймиз. Акцияларнинг 75% ҳозир, қолган 25% эса биринчи битим молиявий ёпилганидан уч йил кейин сотиб олинишидан бошқа. "Иблис эса мана шунақа майда деталларда" ўтиради. Бизга маълум очиқ маълумотларга таянсак, Ипотекабанкнинг 1 декабрь ҳолатига жами капитали 520 млн доллар, қаттиқ капитали 425 млн.доллар атрофида бўлган. 1 январь ҳолатига маълумотлар бундан сал яхшироқ бўлиши табиий. Агар 1 декабрь ҳисоботига суянилса, банк жами капиталининг номиналига нисбатан 63% қийматда сотилгани ойдинлашади. Ипотекабанк Ўзбекистонда рентабеллиги инфляциядан юқори кам сонли давлат банкларидан бири экани ва бозор нархи номиналига етадиган биронта давлат банки йўқлиги инобатга олинса, бу паст нарх эмас. Бу ёрқин келажак учун тўлов эмас, бу ёмон ўтмиш учун скидкани англатади. Қайтараман, ёпиқ шартлар кўп нарсага ойдинлик киритади.