Бюджет ишоралари: Таълим Бирламчи тақсимловчи Халқ таълими вазирлиги орқали 29,6 трлн.сўм харажат мўлжалланган. Бу ўтган йилга нисбатан 13,8%га кўп дегани. Эслатиб ўтамиз, жами бюджет харажатлари 2022 йилга нисбатан 22,5%га ошган. Бу дегани таълим бўйича харажатлар нисбатан камайган. 2022 йил билан солиштирганда, халқ таълими муассасаларини кенг полосали Интернет тармоғига улаш учун харажатлари (120,0 млрд.сўм) чиқариб ташланган. Республика китоб жамғармасининг харажатлари ўтган йилги 1 299,3 млрд.сўмдан 946,5 млрд.сўмгача, яъни 27%га камайган. Айни пайтда Халқ таълими вазири жамғармаси учун ажратилган маблағлар 130,0 млрд.сўмдан 150 млрд.сўмгача ошган. Боғча вазирлигининг харажатлари 8,0 трлн.сўм этиб белгиланган. Бу ўтган йилга нисбатан 8,5%га кўп. Яъни бу йўналишда ҳам нисбий камайиш рўй берган. 2022 йил билан солиштирганда боқувчисини йўқотган хотин-қизлар фарзандлари учун ота-оналар бадали тўловларини қоплаш билан боғлиқ харажатлар (18,9 млрд.сўм) чиқариб ташланган. Олий ва ўрта махсус таълим вазирлигининг харажатлари қарийб 6,0 трлн.сўм этиб белгиланган. Бу ўтган йилга нисбатан 46,4%га кўп. Лекин бу алдамчи рақамлар. Харажатлар 2022 йилга нисбатан 2 баробардан зиёдга кўпайган объектларни лойиҳалаштириш, қуриш (реконструкция қилиш) ва жиҳозлаш учун капитал қўйилмалар (591,5 млрд.сўм) ва ривожлантириш дастурлари учун харажатлари (503,0 млрд.сўм) ҳисобига рўй берган. Кеча тиббиёт бўйича ёзганимиздек, таълим йўналишида ҳам бюджет харажатлари мақбуллаштирилган, яъни қисқартирилган. Ошган харажат моддалари бўлса ҳам, бу асосан давлат буюртмаларини ўзлаштириш каналларига тааллуқли.