Расман: “Ipoteka-bank”нинг 75%и OTP Bank назоратига ўтди Тарқатилган релизга кўра, OTP Bank “Ipoteka-bank”нинг 75% акцияларини сотиб олиш бўйича транзакцияларни амалга оширган. 75% улушнинг амалдаги эгаси Иқтисодиёт ва молия вазирлиги ҳисобига қанча маблағ келиб тушгани айтилмаган. Аввалроқ, “Ipoteka-bank” 324 миллион долларга сотилгани ҳақида маълум қилинганди. Бу миқдор акцияларнинг 75% қиймати учунми ёки 100% тўлов қийматими, аниқ очиқланмаган. Расмий ахборотда “Ipoteka-bank” акцияларининг қолган 25%и келаси 3 йилликда сотиб олиниши қайд этилган. Бунда мазкур опцион шартлари ҳам очиқланмаган. Одатда кейинги пакет банкнинг бозор нархларининг ўсишидан келиб чиқиб нархланади ва битим қийматлари ҳам кескин фарқланади. Масалан, TBC Bank Group Payme'нинг 51% улуши учун 2019 йилда 5,5 млн.доллар тўлаган бўлса, орадан 4 йил ўтиб қолган 49% улуш учун 10 баробардан зиёд, 55,7 млн.доллар тўлашга тўғри келган.