Чўзилиш халқ фойдасига бўлса, кутиш мумкин Давлетовўз бюджет процедураси бу йил ҳам қонунчиликда белгиланган саналардан ўтиб, чўзилаётганига эътибор қаратмоқда. Ўтган йилги ҳолат тушунарли эди, сайлов кампанияси вақтида ваъда қилинган, очиқланган серхаражат режаларни бюджетга қайта киритиш ва унинг манбаларини мувозанатлаш бирмунча вақт олган эди. Ташқи қарз манбалари имконли бўлган ўтган йилги шароитда бу деярли қийинчилик туғдиргани йўқ. Бу йил 'эса аҳвол ўзгачароқ, аниқроғи оғирроқ. Иқтисодий ўсиш секинлашади, демакки, бюджет даромадлари ҳам камаяди. ҚҚСнинг пасайтирилиши ва имтиёзлар тарқатилишининг давом этаётгани даромадлар оқимига босимни янада кучайтиради. Қарз нархлари осмонга ўрлаган. Харажатлар эса ҳечам камайишни истамайди. Айниқса, давлат аппарати ва бошқарув тизими ҳеч қачон ўзини ўзи қисқартирмайди. Қайтанга, энг оғир дамларда ҳам унинг фақат бузуқ хусусияти ишга тушади. Мен самарасизман, дея ундан воз кечишни сўраган ўринбосар, маслаҳатчи, ёрдамчиларни кўрганмисиз? Биз самарасизмиз, такрормиз, манфиймиз дея ҳукумат кун тартибига ўзини тугатишни сўраб мурожаат қилган вазирлик, қўмита, агентликни эшитганмисиз? Йўқ, ҳаммаси тобора камайиб бораётган бюджетдан кўпроқ пирог ундиришга ҳаракат қилади. Тўқ йилларда катта харажатларга ўрганиб қолиш энг ёмон касалликлардан бири. Бу касалликдан қутулиш кучли сиёсий ирода талаб қилади. Бунинг молиявий механизми эса бюджетдан мустақил бўлган буферлар яратиш ҳисобланади. Яъни, тўқ йиллардаги катта даромадларнинг бир қисми эҳтимолий оч йиллар учун жамғариб қўйилади. Биз нима қилдик? Биз нафақат олтин, мис, газ, кимёдан тушган ҳамма ортиқча даромадларни тўлалигича истеъмол қилдик, биз яна ўтган 10 йилда жамғарилган буфер - Тикланиш ва тараққиёт жамғармаси оқимини ҳам бюджет харажатларига, бўлгандаям энг ёмон, эртага даромад келтирмайдиган харажатларга ва лойиҳаларга тиқиб юбордик. Шунинг учун бюджетни шакллантириш чўзилаётган бўлса, агарки бу пировардида халқ фойдасига ишлайдиган бюджет бўлиб чиқса, сабр қилиб, кутса бўлади.