Менинг йўлим: Курашдан тўхтамаганлар учун Ташаббусли бюджет охирги мавсумида йўлларни таъмирлаш билан боғлиқ 14800 та лойиҳа илгари сурилганди. Яъни йўлларни ўнглаш масаласи бўйича оғриқларни ўз ичига олган лойиҳалар сон жиҳатдан мутлақ чемпион ҳисобланади. Якунда қўшиб берилган квоталар билан ҳисоблаганда жами 629та лойиҳа молиялаштириладиган бўлди. Бу жами илгари сурилган лойиҳаларнинг атиги 4,25%и холос. Шунинг учун бугундан бошланган ва очиқ бюджетнинг таркибий қисми ҳисобланган "Менинг йўлим" лойиҳаси доирасида ҳозироқ таклиф киритишингиз мумкин. 27 апрелгача вақтингиз бор. Айниқса, жамоатчилик бюджетининг охирги мавсумида етарли овоз йиға олмаган 14 минг лойиҳа ташаббускорлари қўл силтамасликларини жуда жуда истардим. Чунки бу сафар йўл лойиҳалари фақат йўл лойиҳалари билан беллашади. Карнайчидан бир пуф. Яна бир неча дақиқа сарф этиб, маълумотларни тўлдиринг. У ёғига худо пошшо, албатта сиздан ҳаракат бўлса.