Газ қазиб олиш ва электр генерацияси қисқариши март ойида янада тезлашган. Кўмир ҳам ёрдам бермайдиганга ўхшайди Март ойида 4,1 млрд.куб газ қазиб олинган. Бу ўтган йилнинг мартига нисбатан 12,2%га кам. Газ қазиб олишнинг қисқариши жорий йилда учинчи ой кетма кет давом этмоқда. Январда қисқариш 7,5%ни, февралда 9,0%ни ташкил этган. Агар фавқулодда мўъжиза рўй бермайдиган бўлса, 2023 йилда ўта оғир ўтган 2022 йилга нисбатан 5-7 млрд.куб камроқ газ қазиб олинади ва умумий газ қазиб олиш ҳажми Ўзбекистон тарихидаги минимум 45 млрд.куб ва балки ундан ҳам камроқ ҳажмгача тушиши мумкин. Газга чамбарчас боғланган электр энергияси ишлаб чиқариш март ойида 5,9 млрд.квт.соатни ташкил этган. Бу ўтган йилнинг тегишли даврига нисбатан 10,6%га кам. Худди газ қазиб олишдаги каби электр генерациясининг қисқариши ҳам тобора тезлашмоқда. Солиштириш учун қисқариш январда 2,0%ни, февралда 2,3:ни ташкил этган эди. Агар пиар қилинаётган янги қувватлар ёрдам бермаса, электр ишлаб чиқариш 2023 йилда 5-6 млрд.квт.соатга, 65 млрд.квт.соатгача қисқариши мумкин бўлади. Эсингизда бўлса, энергетик кризис оқибатларини енгиш учун кўмирга қайтиш режалари эълон қилинганди. Бунинг учун қўшимча жами 5 млн.тоннадан кўпроқ кўмир керак бўлади. Лекин ўтган 3 ойда олигархия қўлига ишончли бошқарувга топширилган кўмир қазиб олиш 14%га қисқариб кетган. Буёғи энди қандай бўлади? Қазиб олишга қўшиб кўмир импорт қилишниям ўшаларга тўлиқ топширамизми?