Раиснинг ғалаба имконияти ошмоқда, турк лирасининг қулаши эҳтимоли ҳам Президентлик сайловларининг иккинчи турига уч кун қолганида деярли барча сўровлар Эрдоганнинг 5-8 фоизгача фарқ билан ғолиб бўлишини кўрсатмоқда. Биринчи турда 5 фоиздан кўпроқ овоз олган Синан Оганнинг қўллови бўлмаганидаям Эрдоган ғалабаси эҳтимоли пасаймаган бўларди. Кузатувчиларга кўра, Оганга овоз берганларнинг овози иккинчи турда кимга ўтиши ё ўтмаслиги аҳамиятсиз вазият юзага келган. Қиличдарўғли электорати биринчи турдан кейинги натижа ва Парламент сайловлари якунларидан кейин кўтаринки кайфиятда эмас. Қизиқ ҳолат шундаки, Раиснинг ғалабаси ойдинлашгани сайин лиранинг истиқболи тундлашмоқда. Спекулятив опционлар доллар курсининг йил охиригача 29 лирага етиши эҳтимолини 36 фоиз атрофида баҳолаган бўлса, ҳозир бу эҳтимол 54 фоизга етган. Долларнинг жорий банклараро курси 20га яқинлашмоқда. Лекин ҳафта бошида Туркия Марказий банки тижорат банкларига валюта сотиб олишга буюртмалар ҳажмини 25 фоизга қисқартириш бўйича оғзаки топшириқлар бергани хақида хабарлар бор..