Ички ишлаб чиқариш кескин қисқариши фонида нефть ва нефть маҳсулотлари импорти кескин ошган Нефть қазиб олиш пасая бошлагани ва бензин ишлаб чиқариш икки карра қисқаргани фонида Ўзбекистоннинг шу маҳсулотлар импортига қарамлигини янада оширган. Ташқи савдо статистикасига кўра нефть ва нефть маҳсулотлари импорти 852,4 млн.долларга етган. Бу ўтганнинг йилнинг шу даврига нисбатан 76,2%га кўп дегани. Бу яна бир марта преференциялар, маҳаллий чўнтак инвесторларга имтиёз тарқатиш сиёсати зиёнли бўлганини кўрсатади. Эслатиб ўтамиз, табиий бойликлар, хусусан нефть қазиб олувчиларга 2 йил аввал Ер қаъридан фойдаланганлик учун солиқлар икки баробарга камайтирилган. Натижада бюджетга тушумлар пасайган, ишлаб чиқариш ҳам қисқаришни бошлаган. Давлат зиён кўрган, ўзбекистонликлар зиён кўрган бу имтиёзлардан ким фойда кўрди, деган саволга жавобни ўзингиз топинг. Умуман олганда, май ойининг ташқи савдоси импортнинг кескин ўсиши (64%га) билан характерланади. Май ойи импорти жами 3,4 млрд.долларни ташкил этган бўлса, шунинг қарийб 1,0 млрд.доллари Хитой ҳиссасига тўғри келган. Албатта, бизнинг юзаки статистикамиз Хитойдан айнан нималар сотиб олинганини аниқлашга имкон бермайди. Импорт таркибида ҳам, экспорт таркибида ҳам саноат товарлари, машина ва транспорт асбоб-ускуналари ўсаётгани қизиқ. Ўзбекистонда феълан ишлаб чиқарилмайдиган машина ва транспорт асбоб-ускуналарининг экспорти ўсишда давом этаётгани санкцияларга тушиб қолиш хавфига жиддий қаралмаётганига ишора беради. Май ойида 84 млн.долларлик газ экспорт қилганмиз. Маълумот учун, Хитой статистикасига кўра, Ўзбекистондан май ойида 78,2 млн.долларлик газ импорт қилинган. Ўртача экспорт нархлари ҳисобга олинса, 330-360 млн.куб атрофида, яъни май ойида қазиб олинган жами газнинг қарийб 10%и экспортга кетган. Рекорд даражада олтин экспортига ва олтинсиз экспорт бироз жонланганига қарамай, ташқи савдо салбий савдоси ўсишда давом этмоқда.