2022 йил ва 2023 йил биринчи чораги бўйича бюджет ижроси очиқланмай қолмоқда Бюджет ижроси бўйича ҳукуматнинг парламентда ҳисобот бериши нақ 30 кунга кечикди. Парламентдаги ҳисоботни кўрганлар бўлса керак, умумий гаплар, олдиндан тайёрланган шаблон саволларга шаблон жавоблардан нарига ўтилмади. Айтиш керакки, бюджет моҳияти очилмади, бюджет моҳияти муҳокама этилмади. Айб ҳисобот берувчида эмас, ҳисобот олувчида ўзи. Ўзбекистонликлар хоҳиш иродаларини ифода этмайдиган формал ҳисобот олувчилар учун моҳият аҳамиятсиз. Парламентдаги юмалоқ ёстиқ ҳисоботдан кейин 8 кун ўтди. Ҳеч ким амал қилмай қўйган Бюджет кодексига кўра, ҳисобот берилганидан кейин Давлат бюджетининг ва давлат мақсадли жамғармалари бюджетларининг ижроси тўғрисидаги ахборот Ўзбекистон Республикаси Молия вазирлигининг расмий веб-сайтига жойлаштирилиши керак (Конституцияга амал қилинмаган мамлакатда Бюджет кодексига амал қилинишини кутишнинг ўзи ақлга сиғмайди). Бюджет ижросига оид ҳеч бир ахборот очиқлангани йўқ, тегишли платформаларга жойлаштирилгани йўқ. Яъни бу ишлар қоидага кўра 15 майдан кейиноқ амалга ошиши керак эди. Бугун 22 июнь. Қовун қовундан ранг олгани каби, бирон бир ҳудуд, на вилоят, на туман кенгашлари маҳаллий бюджет ижроси маълумотларини очиқлашгани йўқ. Улар бу ишни 10 майгача амалга оширишлари лозим эди. Албатта бу ишлар қандайдир ақлсизлик эмас, онгли равишда қилинаётган ишлар. Чунки ярим йил ўтгач, йиллик бюджет ижросининг, 3 ой ўтгандан кейин чорак бюджети ижросига оид саволлар актуаллигини йўқотади, қизиқ ҳам бўлмайди, оғриқ ва боғлиқлик совийди. Бюджетга орқа сана билан ўзгартиришлар ва кейинги йил бюджети жараёни бошланиб кетади. Шунинг учун унгача янграётган онда сонда янгровчи овозлар узвийлик билан игнор қилиб турилса кифоя.