МЧЖ мақомидаги гигант лойиҳалар. Улар қора туйнуклар ҳам Кеча эҳтимолий санкциялардан қочиш учун битта ҳарфи туширилган ва номинал таъсисчи киритилган Digital Holding бўйича маълумотларни ўргана туриб, яна бир марта амин бўлганим шу бўлди: Янги Ўзбекистонда қиймати бир неча юз миллион доллардан бир неча миллиард долларгача турадиган барча лойиҳалар МЧЖ шаклида ташкил этилган. Янги даврни кўз кўз қилиш учун молиялаштирилган гигант лойиҳалар орасида биронта очиқ, яъни акциядорлик жамияти тарзидаги корхонани топа олмадим. Нега ҳукумат назоратидаги фондлар ва идоралар (ФРРУ, Давактив, ҳокимиятлар, давлат компаниялари) яқин дўстлар, ички ва ташқи олигархия билан лойиҳаларни амалга оширишда МЧЖ мақомидан фойдаланишга бунчалар муккасидан кетган? Чунки МЧЖ мақоми муҳим маълумотларни очишни талаб қилмайди. Миллионлаб миллиарлаб долларлик битимлар, буюртмалар, давлат буюртмалари, кредитлар, зарарлар, импорт контрактлар ёпиқ қолаверади. МЧЖ таркибига ким кирди, ким чиқди, улуш кимга, қанчага сотилди, тақа тақ ёпиқ бўлади. Молиявий ҳисоботлар ёпиқ бўлади. Ваҳоланки, буларнинг ҳаммасида давлатнинг, яъни солиқ тўловчиларнинг пули ишлатилади. Сиз энг катта ёпиқ ўпқон Uzbekistan gtl МЧЖ ўтган йили ва охирги 6 ойда қанча зарар кўрганини биласизми? Сиз Digital Holding МЧЖ асосий твъсисчиси 4,90 фоиз улушини қанчага сотганини ва нега Давактив бу улушни олмаганини биласизми? Сиз каррасига қимматлаштирилган счетчиклар йиғувчи Технопарк МЧЖ қанча давлат буюртмасини тендерсиз эгаллагани ва йилига қанча "запчасть" импорт қилаетганини биласизми? Ангрендаги бир неча миллион доллар сарфланган ва якунда ўрисларга сув текинга топширилган "Биринчи резинотехника заводи" МЧЖнинг қанча кредитлари "списать" қилинганини-чи? Булар шунчаки эсимга тушганлари. Давлатнинг бевосита ва билвосита Иштирокидаги қиймати 100 млн.долларгача бўлган яна ўнлаб шунақа зпқон лойиҳалар МЧЖ тарзида ташкил этилган ва фаолият кўрсатмоқда. Охирги йилларда бу авж олса, олмоқдаки, тўхтагани йўқ. Балки бу кетишда аввалдан Акциядорлик жамияти бўлган Ўзбекнефтегаз, Ўзтрансгаз, Иссиқлик электр станциялари, НГМК ва АГМКларни ҳам МЧЖга айлантириб юборишар. Чунки шунда енг остида чайиш, кўздан панада ўзлаштириш янада осонлашади.