Click АЖга айланади, қолганлар-чи? Click тўлов ташкилоти МЧЖдан акциядорлик жамиятига айланмоқда. Тегишли трансформация жараёнлари KAP DEPO инвестиция компанияси кўмагида юз беради. Тўлов тизими операторлари ва тўлов ташкилотлари фақат акциядорлик жамияти шаклида ташкил этилиши ва фаолият кўрсатиши бўйича талаблар 2024 йил 1 июлдан кучга киради. Бу кенг кўламли иқтисодий риск ва ижтимоий оқибатлар билан боғлиқ соҳалардан бирида корпоратив очиқликни таъминлаш бўйича ташланган илк қадам холос. Бизнес фақат Акциядорлик жамияти орқали амалга оширилиши талаб қилинадиган соҳаларни кенгайтиришда давом этиш зарур. Ахир қачонгача триллионлаб активларга, давлат буюртмаларига, айланмаларга эгалик қилаётган энергетика компаниялари, уяли алоқа, ҳаво транспорти каби давлат ва жамият учун муҳим жараёнларни очиши шарт бўлмаган хўжалик юритишнинг МЧЖ ортига яшириниши керак? Сиз энг катта ёпиқ ўпқон лойиҳа Uzbekistan gtl МЧЖ 2022 ва 2023 йилда қанча зарар кўрганини биласизми? Сиз Ўзбекистонда энг кўп нефть конлари қайси МЧЖга тегишли эканини, унинг йирик битимларини биласизми? Сиз каррасига қимматлаштирилган счетчиклар йиғувчи Технопарк МЧЖ қанча давлат буюртмасини тендерсиз эгаллагани ва йилига қанча "запчасть" импорт қилаетганини биласизми? Технопарк МЧЖ ёпиқ қарор билан ишончли бошқарувга бериб юборилгани ҳақида эшитдингизми? “UNG Petro” МЧЖ заправкалари қайси кўринмас қўлга ўтказилганини-чи? Шу юмалоқ ёстиқ ишларниинг ҳаммаси тийиқсиз ўзбек амалдорларининг севимли хўжалик юритиш мақоми бўлган МЧЖ пардаси остида юз бермоқда.