Йирик акциядорлик жамиятларининг МЧЖга айлантирилиши ёпиқликни янада кучайтиради Ўзбекистонда яна бир акциядорлик жамияти, энг йирик тўртта цемент заводдан бири, санкциялар остидаги Оҳангаронцемент АЖдан МЧЖга айлантирилган. Бу йирик АЖларнинг биринчи марта МЧЖга айлантирилиши эмас. Масалан, “хусусийлаштирилиши”дан олдинроқ Фарғона нефтни қайта ишлаш заводи ҳам МЧЖга айлантирилганди. МЧЖ мақоми корхона молиявий натижалари, йирик қарз ва хўжалик битимларидан тортиб аффилланган шахсларгача маълумотларни ёпиқ ҳолда сақлаш имконини беради. МЧЖда дивиденд ва ҳисобдорлик талаб қиладиган миноритар акциядорлар деган “бошоғриқ” йўқ. Қизиғи, Ўзбекистонда бир неча миллиард долларлик пудратларни ўзлаштирувчилар, триллионлаб сўмлик давлат буюртмалари, кафолатли харид ва билвосита бюджет ўзлаштирувчиларининг деярли ҳаммаси МЧЖ мақомида. Уларнинг ички ва ташқи қарзлари триллионлаб сўм ва миллиардлаб долларларга етган. Охирги пайтда улар ўзларини чемпион тадбиркорлар (қандай йўл билан ва қайси кабинетларда чемпион бўлишган?) деб аташларини хуш кўришади, лекин битимлари ва бизнесларини МЧЖ кўрпаси остида сақлашни маъқул кўришади. Ўзбекистонда АЖ мақомида иш юритилиши мажбурий бўлган бизнес фаолиятлар ва кўламлар белгиланмаган. Бу эса исталганча манипуляциялар яратиш, истеъмолчилар, ишчи-меҳнаткашлар, кредиторлар ва албатта давлатниям алдашга йўл очади ва очмоқда (ишчилари ярим йиллаб иш ҳақи ололмаётган, ҳамкорлари ва солиқлардан қарз, лекин хўжайинлари хусусий самолетда учадиган, янги ва янги зараркунанда лойиҳаларни ўйлаб топаётган энергошоввоз компанияларни эсланг). Шундай экан, триллионлаб айланма ва активларга эга компаниялари, йирик солиқ тўловчилар, монополистлар давлат ва жамият учун муҳим жараёнларни очиши шарт бўлмаган хўжалик юритишнинг МЧЖ ортига яшириниши тақиқланиши зарур. Уларнинг хўжалик юритиш шакли Акциядорлик жамияти бўлиши мажбурий бўлган нормалар қонунчиликка киритилиши пайти аллақачон келган.