Сайловдан кейинги Туркияда ёқимсиз қарорлар даври бошланди Лира курсини сунъий ушлаб туриш билан боғлиқ чекловлар олиб ташлангач ва захираларни тугатай деган интервенцияларга барҳам берилгач, доллар курси юқорилашда давом этди, лекин прогноз қилинганидан пастроқ коридорда барқарорлашди. Ўтаётган ҳафтада долларнинг лирага нисоби тебранишлари ниҳоят тўхтади. Энди ҳукуматнинг эътибори валюта бозоридан фискал соҳага ва солиқларга қараб кўчмоқда. Чунки пандемиядан кейин ва айниқса сайлов кампанияси давридаги популистик қарорлар ва ваъдалар бюджет мувозанатини бутунлай издан чиқарган. Демак, янгиланаётган ставкаларга кўра, Туркияда давлат хизматлари кўрсатиш учун йиғимлар 50 фоизга оширилган. Аҳолининг барча қатламдаги истеъмолига таъсир ўтказувчи солиқ бўлган ҚҚС ставкаси кундалик истеъмолдаги товарлар бўйича 8%дан 10%гача, бошқа товарлар бўйича 18%дан 20%гача кўтарилган. Банк ва суғурта операциялари бўйича солиқ ставкаси 10%дан 15%гача, қимор ўйинларига солинадиган солиқ 10%дан 20%гача оширилган. Шунингдек, корпоратив фойда солиғини 20%дан 25%гача етказиш режалаштирилмоқда. Четдан олиб келинган телефонлар учун регистрация йиғими 6 минг лирадан 20 минг лирагача кўтарилган. Айтиш керакки, сайловолди дебатларида кейинчалик ғолиб бўлган номзод ҳам, мағлуб бўлган номзод ҳам солиқларнинг оширилиши масаласини ва умуман ёқимсиз мавзуларни четлаб ўтишга ҳаракат қилишган.