Янги Ўзбекистоннинг ёпиқлик даври расман бошландими? Корпинфо канали акциядорлик жамиятлари билан боғлиқ очиқ ахборотлар жойлаштириладиган ягона платформа бўлган openinfo.uz базасидан муҳим фактлар ва ҳисоботлар бир муддат йўқолиб қолганига эътибор қаратмоқда. Албатта бу ҳолат ўзбек расмийлари томонидан техник муаммо билан изоҳланиши ёки умуман ҳеч нима бўлмагандек игнор қилиниши ҳам мумкин. Айни дамда сизларнинг эътиборингизни очиқлик билан боғлиқ бошқа масалага қаратмоқчиман. Акциядорлик жамиятларига оид қонунчиликка кўра, 30 июнга қадар йиллик умумий йиғилишлар ўтказилиши ва йиллик ҳисоботлар камида икки ҳафта аввал очиқланиши керак. Бугун 10 июль. Лекин ўнлаб давлат назоратидаги акциядорлик жамиятлари йиллик ҳисоботларини очиқлагани йўқ. Улар орасида айниқса энергетика компаниялари етакчи (уларнинг фаолияти ва сувдан доим силлиқ чиқадиган раҳбарияти қонундан ташқарида туришини биринчи марта кўраетганимиз йўқ). Хусусан, айни дамгача на Ўзбекнефтегаз, на Ўзтрансгаз, на Ўзгазтрейд 2022 йил якунлари бўйича йиллик ҳисоботини тақдим этган. Йиллик ҳисоботларни тақдим этмаслик ёки кечиктирганлик учун бирон марта мазкур компаниялар жаримага ёки жазога тортилганини эслай олмайман. Шунинг учун ҳам улар қоидаларга чайса қилиб тупуриб қўйишган. Мисол учун, Ўзбекнефтегаз 2021 йилнинг ҳисоботини 2023 йил март ойига келибгина тақдим этган. Чораклик ҳисоботларни эса 2020 йилдан бери очиқламайди. Яна бир ҳолатниям айтмаса бўлмайди. Ўзбекистонда фаолият кўрсатаетган аудиторлик компаниялари, ҳатто йирик тўртлик дейиладиган компаниялар (эътибор берсангиз, мутлақо тасодифга кўра, айнан улар "прихватизация" жараенининг фаол маслаҳатчиларига ва комиссионерларига айланишган) давлат компанияларининг ҳисоботларига зеб ва чирой беришда феълан шерикка айланиб улгуришган. Янги даврда аудиторларга боғлиқ талаблар, агар масала давлат компанияларига оид бўлса, ишламай туриши нормага айланган. Ахир улар катта тўртлик, қиммат репутация деган эътирозларни билдиришингиз мумкин. Лекин шу вақтда, масалан, сизга Arthur Andersen ва Enron билан боғлиқ кейсни ёдга солишни тавсия этаман.