Кремль методичкаси бўйича цензура Ўзбекистонгаям кириб келди ОАВ ва медиани телефон қўнғироғи,, маъмурий босим ё топшириқлар билан суннатлаш имкони бўлмаганда иқтисодий ричаглар ишга тушади. Айнан иқтисодий ричаглар цензуранинг энг самарали усули экани Путин Россияси мисолида 2000 йилларда НТВ ёпилишидан тортиб яқин-яқинларгача қолган қутган ОАВларни кунпаякун қилишда намоён бўлган. Путиннинг дўстлари, ошпазидан тортиб ялоқхўр олигархларигача ОАВ улар ҳақида танқидий материал эълон қилса ё суриштирувларни амалга оширса, миллиардлик даъво аризалари билан яна Путин ва унинг дўстлари тайинлаган судларга мурожаат қилишнинг ҳадисини олишган. Худди шу методичка ниҳоят Ўзбекистонга ҳам кириб келганга ўхшайди. Қаерда давлатники, қаерда оиланики эканини ажратиш имконсиз даражага етганлиги ҳақидаги мақолага жавобан "Ипак қурти" вазири Бахром Шарипов kun.uz ва унинг мухбири Шокир Шариповни судга берган. Kun.uz ва журналист Шокир Шариповдан бир миллиард сўмлик компенсация тўлаш талабиниям унутмаган. "Ипак қурти" вазирининг тажрибасидан, агар бу иш наф берса, тез орада бошқа ўзбек вазирлари ва ҳокимлари ҳам фойдаланишга ўтишлари аниқ. Чунки янги Ўзбекистонда чиновникларда давлат ва хусусий жунларининг бирикиб кетиши одатий ҳолатга айланиб бўлган. Мақоладан кейин Коррупцияга қарши кураш агентлиги ё Бош Прокуратура "Ипак қурти" вазирига нисбатан суриштирувларни амалга ошириши керакмасмиди, дея сўраб кўрманг. Бундай амалиёт нормал давлатлар учун норма. Янги Ўзбекистон учун эмас.