Юнистрим пул ўтказиш тизимининг эгаси бўлган Юнистрим банкига қарши АҚШ санкциялари эълон қилинди Қўшма штатлар Россиянинг яна бешта банкини блокловчи санкцияларни кўзда тутувчи SDN (Specially Designated Nationals and Blocked Persons) рўйхатига қўшди. Улар «Тинькофф», «Юнистрим», «Солидарность», Локо-банк ва Петербург СКБ. Юнистрим банки шу номдаги пул ўтказиш операторининг эгаси ҳисобланади. Тизим Россиядан Ўзбекистонга пул ўтказмалари ўтказишда етакчилардан бири. Санкция киритилгвн Тинькофф банкининг тадбиркор Олег Тиньковга ҳозирда алоқаси йўқ. Уруш бошлангач, Тиньков Россия агрессиясини қаттиқ қоралаган ва шундан кейин банкининг акцияларини арзонгаровга Кремль олигархларидан бирига топширишга мажбур бўлганди. Кенгайтирилган санкциялар рўйхатига яна Путиннинг либерал ҳамтовоғи дейиладиган, собиқ молия вазири Алексей Кудрин ҳам қўшилгани эътиборли. Уруш бошлангандан кейин у Яндекс компаниясида маслаҳатчи сифатида ишлаб келаётганди.