Қуёш панеллари учун ягона идентификатор доимий генерация бўлиши керак Маъмурий-буйруқбозлик режимида ўрнатилаётган қуёш панеллари бўйича кўзбўямачилик ва сохтакорликни олдини олмоқда деб айтилаётган Яшил энергия ахборот базаси ростанам мавжуд реалликни акс эттирмоқдами? Жойлардан келаётган хабарларга кўра, назорат жараёни вақтида қуёш панеллари ўрнатилганини кўрсатиб беришдан иборат "ижара хизмати" пайдо бўлган. Божхона (электр тармоқлари, банк, ҳокимият) вакили келиб суратга олиб, базага тушириб кетгунча панелларни ижарага бериш хизмати 100-200 долларга етган. Кунига. Нега суратга тушириш? Чунки қуёш панеллари ростанам ўргатилганини белгиловчи ягона идентификатор ўлароқ Божхона вакилининг объектига келиб суратга тушириши ва Яшил энергия ахборот базасига киритиш асос қилиб олинган. Яшил энергия базасида ўрнатилгани қайд этилаётган қуёш панеллари ва инверторларининг уникал рақами мавжуд эмаслиги кўзбўямачиликнинг янги кўринишини бозор хизматига айлантиришга туртки бўлган кўринади. Яна бир масала айни объектда ўрнатилган қуёш панелини бир неча марта базага қайта киритилиши билан боғлиқ. Чунки режа банкларгаям, турли тармоқларгаям, ҳокимиятларгаям белгиланган. Айрим ҳолларда бир ҳудудда ўрнатилган панеллар икки ҳудуд учун ҳисобга киритилишига оид муаммолар қайд эьилган. Айтайлик, қуёш панели ўрнатиши керак бўлган биз А ҳудудда рўйхатдан ўтган, лекин ишлаб чиқариш объектлари В ҳудудда жойлашган. Албатта, ҳар қандай бюрократик режим атайин қилинмасада, янги ва янги муаммоларни яратаверади. Назоратнинг кучайтирилиши, кенгайтириши харажатларни ошираверади, янги алдов ва ёлғонларни кашф этишга туртки бераверади. Чунки бу ерда жараён ихтиёрийлик ва бозор устига эмас, мажбурийлик ва буйруқ устига қурилган. Ҳозирги шароитда қуёш панеллари ўрнатилишида сохтакорликни камайтирадиган ягона чора бу доимий генерациянинг умумий маҳраж, яъни ягона идектификатор қилиб олиниши бўлиши керак. Яъни, объектда генерация йўқми, бир кун, бир соат, уч кун, бир ҳафта ишлаб, узилдими базадан чиқарилиши лозим. Чунки бу ё муляж ё юқорида айтганимиздек вақтинчалик ижара. Қуёш панеллари ўрнатилган идора ва ташкилотлар қирқимида генерация қилинаётган электр энергияси ҳақида маълумотлар очиқ ва шаффоф бўлиши кераклиги ҳақида жуда кўп ва хўб ёзилди. Бу кетишда яна ёзилади. Кузгача. Кейин эса айбдорлар ахтарилади. Ҳар доимгидек.