Банклар омонатлар фоизларини оширишни бошлашди Омонат бозорининг асосий хусусий ўйинчилари, уларнинг ортидан давлат банклари ҳам муддатли омонатлар бўйича ставкаларни кўтара бошладилар. Августдаги "курс тўғирланиши"дан кейин омонатлар ставкалари 25%гача шаклланган янги коридорда барқарорлашгандек эди. Бу сафарги кўтарилишга қандай омиллар туртки бермоқда. Биринчидан, йилнинг охирида, айниқса янги йилга яқин кредит, хусусан, чакана кредит маҳсулотларига талаб сезиларли даражада ортади. Банклар 15 декабрга бормасдан кредитлашни тўхтатиб қўймаслиги учун депозит базасининг барқарор ўсишини таъминлашлари керак. Бу вазифани бозордан қимматроқ ёки нисбий афзал шартларни таклиф этибгина амалга ошириш мумкин. Иккинчидан, ўтган йиллардан фарқли равишда жорий йилнинг охирги чорагида банк тизими ресурс базасининг асосий канали бўлиб келган фискал рағбатлантиришга катта умид қилмасаям бўлади. Декабрда олдинги йиллардагидек бозорда "пул кўпайиб" қолмайди. Учинчидан, даромадларнинг ўсиши анча секинлашгани омонат бозоридаги таклиф ўсишини ҳам секинлаштирмоқда. Бунинг устига яқин ва ўрта истиқболда реал кўрсаткичларда пасайиши кўринмаётган юқори инфляция йирик омонатчиларни даромадларни кўпайтиришнинг муқобил вариантларини излашга ундамоқда. Шундай экан, омонат бозори учун 25 фоиздан юқори ставкадаги таклифлар бу янги реаллик ва янги коридор эканини қабул қилиш керак бўлади.