180 нафар ўзбекистонлик тадбиркор Шанхай шаҳри мезбонлик қилаётган "ITMA ASIA + CITME" кўргазмасида қатнашиш учун манзилга етиб борди. Катта делегацияннг Хитойга сафари президентнинг ушбу мамлакатнинг раҳбарияти билан ўтказган қатор музокара ва келишувлари маҳсули дейиш мумкин. Алоҳида айтиш жоизки, тарихда илк бор 180 нафар тадбиркор бирлашиб, савдони ривожлантириш ва янги ҳамкорликларга эришиш учун сафарга отландилар. Енгил саноатдан хабари борлар билишадики, бу халқаро кўргазма янги маҳсулот ишлаб чиқаришни мақсад қилган текстилчилар учун айни муддао. Тўқимачилик соҳаси тадбиркорлари Шанхайдан янги ускуна ва технологияларни юртимизга олиб келишни мақсад қилишган. Савдо-саноат палатамиз сўнгги йилларда микро, кичик ва ўрта бизнес учун жон куйдириб келаётгани кўзга ташланаяпти. Қуруқ мажлисбозлик, ура-урачилик билан чекланмасдан, амалий ишларни бажариш, бундай турларни ташкил этиш албатта тўқимачилик соҳаси ривожланишига замин яратади. Маълумот учун, 180 нафар ўзбекистонлик текстилчиларнинг йиллик экспорт ҳажми 420 млн доллар, мавжуд ишчи ўринлари эса 87 мингтани ташкил қиларкан.