Энди саволлар Марказий банкка берилиши керак: Учинчи марта бенефициарини ўзгартирган AVO bank устав капиталини барибир шакллантирмаган Марказий банк капитал ва пруденциал талабларни йиллар давомида бузиб келаётганига қарамай, AVO bank (собиқ Ўзагроэкспортбанк) лицензиясини чақириб олишга шошилаётгани йўқ. Банклар ва банк фаолияти тўғрисидаги қонунга кўра, банк устав капитали миқдори банк устав капиталининг энг кам миқдорига нисбатан белгиланган талабга мувофиқ эмаслиги, банк кетма-кет келувчи уч чоракнинг ҳар бирида банк регулятив капиталининг ўн фоизидан ортиқ ёки муддатидан қатъи назар, регулятив капиталнинг эллик фоизидан ортиқ миқдорда зарар кўрган бўлса ёки зарар кўриш эҳтимоли лицензияни чақириб олиш учун етарлича асос ҳисобланади. 1 ноябрь ҳолатига AVO bank'нинг жами капитали яна 3 млрд.сўмга камайиб, 43 млрд.сўмни ташкил этган. Катта эҳтимол йиғилиб бораётган зарар миқдори яна 3 млрд.сўмга ошиб 38 млрд.сўмга етган. Охирги очиқламаларга кўра, бир неча кун аввал янги бенефициар деб эълон қилинган Руслан Адильбаев кенгаш аъзосига айланган. Қизиқ тарафи, янги менежмент тузган илк қарорлари Банк номи билан боғлиқ лицензион ҳуқуқлар бўйича 816 346 342,92 сўмлик бир марталик ва ҳар чоракда 2 170 000 000 сўмлик тўловларни амалга ошириш, шунингдек, 700 000 000 сўмга сайт яратиш, ҳар чораклик 34 327 260 сўмлик тўловни амалга ошириш билан боғлиқ бўлган. Ҳар икки битим бўйича маблағларни олувчи "AVO SERVICES AND TECHNOLOGY" МЧЖ. МЧЖнинг 100% улуши “AVO.uz” МЧЖ ҚКга тегишли ва унга AVO bank раиси ҳисобланган Попов Артем Анатольевич раҳбарлик қилади. Яъни, моҳиятан, "янги инвесторлар" ҳали банкка бир сўм киритмасдан туриб, банкдан биратўла ва ҳар чоракда олиб чиқиб кетадиган пулларини кафолатлаб қўйишган (қанча зарар кўришидан қатъий назар). Қойилмисиз? Табиийки, энди саволлар регуляторга берилиши керак, Марказий банк бу сафар ҳам индамай, кўз юмиб кетадими? Агар севимли AVO bank ёки Микрокредитбанк эмас, бошқа банклар ёки тўлов ташкилотлари шундай схемаларни амалга оширганида неча соат ичида лицензияси тортиб олинган бўларди?