Қилса бўлар эканку! Марказий банк “Евроосиё Банки” акциядорлик жамиятидан банк фаолиятини амалга ошириш ҳуқуқини берувчи лицензияни чақириб олган. Регулятор лицензиянинг чақириб олинишига сабаб сифатида банк томонидан устав капитали миқдори қонунчиликда белгиланган энг кам талабларга мувофиқлаштирилмаганлиги ҳамда банклар ва банк фаолияти тўғрисидаги қонунчиликда белгиланган бошқа талаблар бажарилмаганлигини кўрсатган. Очиқ маълумотларга кўра, Евроосиё Банки кредит ва депозит портфелини шакллантирмаган, жами капитали 104 млрд.сўмни ташкил этган, белгиланган миқдорда (500 млрд.сўм) устав капиталини шакллантирмаган. Биринчи ярим йилликни 51,6 млрд.сўм зарар билан ёпган. Евроосиё Банки охирги бенефициарлари бўлган шахслар Евроосиё молиявий компанияси доирасида ўзаро судлашишда давом этишмоқда. Уларнинг Ўзбекистонда янги даврда аралашган ёки бошлаган лойиҳалари тақдири алоҳида тадқиқот ва суриштирувлар мавзуси. Қонунга кўра, банк устав капитали миқдори банк устав капиталининг энг кам миқдорига нисбатан белгиланган талабга мувофиқ эмаслиги қўпол қоидабузарлик ҳисобланади ва бунинг учун банк лицензияси чақириб олиниши керак. 1 август ҳолатига 500 млрд.сўмдан кам жами капиталга эга 5та (тўпланган зарар туфайли капиталини еб қўйишган), 50 млрд.сўмдан кам уставга капиталга эга 3та банк бўлган.