Устав капиталини минимал талабга етказмаган банклар лицензияси тўхтатиладими? 2025 йилнинг 1 январь ҳолатига Ўзбекистондаги тўртта тижорат банкининг устав капитали минимал талаб бўлган 500 млрд сўмга етказилмаган. Булар Yangi Bank, Евроосиё банки, Пойтахт банк ва Эрон Содерот банклари. Қизиғи, мазкур банклар 2024 йил 1 апрелидан кучга кирган 350 млрд.сўмлик минимал талабларни ҳам бажаришмаган. Яъни, улар устав капиталини ошириш бўйича лозим даражада ва жиддий ҳаракат ҳам қилишаётгани йўқ. Қонунга кўра, банк устав капитали миқдори банк устав капиталининг энг кам миқдорига нисбатан белгиланган талабга мувофиқ эмаслиги қўпол қоидабузарлик ҳисобланади ва бунинг учун банк лицензияси чақириб олиниши керак. Омонатчилари ва кредиторлар манфаатларини ҳимоялаш учун 2025 йил 1 январдан кейин ҳам устав капиталини минимал талабга етказмаган банкларга нисбатан жазо чоралари қўлланилгани ёки актив ё пассив операцияларига нисбатан бирон-бир янги чекловлар киритилгани ҳақида очиқ маълумотлар мавжуд эмас.