Кредитлар ставкаси 42 ойлик, узоқ муддатли депозитлар ставкаси 10 йиллик максимумларгача кўтарилган Ноябрь ойи якунлари бўйича жами кредитлар бўйича ўртача тортилган ставка 23,8%га (+1,1%) етган. Бундан қимматроқ нарх 42 ой аввал, пандемия даврида, ҳали маъмурий йўл билан фоизларни чеклаш қўлланилган мақбул фоизлар сиёсати бошланмасдан қайд этилган эди. Ой давомида чакана кредитларнинг нархи 25,1% (+0,7%)гача кўтарилган, корпоратив кредитлар янаям тезроқ 22,5% (+1,4%)гача қимматлаган. Муддати икки йилдан ўн йилгача бўлган кредитларнинг ставкаси 25%дан паст эмас. . Кредитларнинг ўртача нархининг қимматлашиши ресурс тақчиллиги фонида банклар йил якунлангани сайин кредитлаш амалиётини секинлаштираётгани, шунингдек, аввалги даврда ажратилган арзонроқ маъмурий кредитларнинг сўндирилиши ёки "ҳисобдан чиқарилиши" билан боғлиқ ҳам бўлиши мумкин. Депозитлар умумий нархи ҳам ошишда давом этмоқда. Хусусан, муддати 1 йилдан ортиқ бўлган депозитларнинг ўртача ставкаси 20,7%га етган. Бу маълумотлар мавжуд бўлган 2013 йилдан буён энг баланд ставка. Аҳоли омонатларининг ўртача ставкаси 21,6% (+0,2%) етган бўлса, корпоратив депозитларнинг нархи 17,4% (-0,5%)ни ташкил этган. Омонатлар ва корпоратив депозитлар нархи ўртасида сақланиб қолаётган катта фарқ бу коррупцион фарқ, корпоратив депозиторлар асосан давлат ёки давлат назоратидаги субъектлар бўлгани учун Ўзбекистонда корпоратив депозит бозори мавжуд, деб ҳисоблаб бўлмайди. Бу борада шаффофлик ва очиқликни таъминлаш бўйича бирон бир қадам ташлангани йўқ.