​2023 йилда Марказий банк қанча олтин сотиб олган ва қанча валюта интервенцияси қилган? Бу саволга аниқ тийинигача жавоб қилиш қийин. Чунки Марказий банк жуда оғир келган ва катта захираларимизни емириб юборган 2023 йилнинг 1- чораги бўйича шарҳлар ва маълумотларни эълон қилмаган. Лекин охирги шарҳда берилган инфографикага асосланиб, 2023 йил 1- чорагида тахминан 18 трлн.сўм олтин сотиб олингани ва 46 трлн.сўмлик эквивалентда (4,0 млрд.доллар) валюта интервенцияси амалга оширилганини баҳолаш мумкин. 2023 йил 2- чорагида 19,5 трлн.сўмлик олтин харид қилинган, 28 трлн.сўм эквивалентида (2,4 млрд.доллар) соф валюта сотилган. 2023 йил 3- чорагида 19,5 трлн.сўмлик олтин сотиб олинган, 22,8 трлн.сўм экивалентида (1,9 млрд.доллар) соф валюта интервенцияси қилинган. 2024 йил 4- чорагида Марказий банк 21,5 трлн.сўмлик олтин харид қилган. Амалга оширилган соф интервенциялар 8,7 трлн.сўм эквивалентини (717 млн.доллар) ташкил этган. Демак, жами ҳисобланса, 78,5 трлн.сўмлик (ўртача йиллик курсда 6,7 млрд.долларлик) олтин харид қилинган, соф валюта интервенциялари эса 105,5 трлн.сўм эквивалентида (9,0 млрд.доллар) юз берган бўлиши мумкин. Ушбу баҳолашда ноаниқликка йўл қўйилган бўлса, Марказий банк қўшимча ахборот билан ҳисобларимизни тузатиши мумкин.