Марказий банк тўртинчи чоракда "олтин-валюта захиралари нейтраллиги"ни сақламоқчи Регулятор "Пул бозори ва ликвидлилик шарҳи"да ички валюта бозорида талабнинг нисбатан юқори шаклланиши фонида ликвидлилик қисқариб бораётганини қайд этган. Июль-сентябрь ойларида Марказий банк 19,5 трлн.сўмлик олтин сотиб олган. Ички валюта бозорига интервенциялар ҳажми 1,9 млрд.доллар ёки 22,8 трлн.сўм эквивалентидан иборат бўлган. Регулятор соф интервенцияларнинг олтин харидидан юқорилигини (0,3 млрд.долларгача) олдинги даврларда ички валюта бозорида таклиф ҳажмининг етарли бўлганлиги сабабли сотиш имконияти бўлмаган хорижий валютанинг "нейтраллик тамойили" доирасида интервенция қилиниши сифатида баҳолаган. Қайд этиш керакки, 2- чоракда ҳам интервенциялар ҳажми (28 трлн.сўм) сотиб олинган олтин ҳажмидан (19,5 трлн.сўм) юқори эди. Ундан аввалги давр - 2022 йил июлдан 2023 йил мартгача Марказий банк қанча олтин сотиб олгани ва қанча интервенция қилгани очиқланмаган. Регулятор келгуси, яъни 4- чоракда ички валюта бозорига интервенцияларнинг "олтин-валюта захиралари нейтраллиги" тамойили асосида амалга оширилиши кутилмаларини қайд этган.