III чоракда ҳам сотиб олинган олтиндан камроқ валюта интервенцияси амалга оширилган Июль-сентябрь ойларида Марказий банкнинг маҳаллий ишлаб чиқарувчилардан қимматбаҳо металлар хариди 29,5 трлн.сўмни ёки тахминан 2,3 млрд.долларни ташкил этган. Лекин ички валюта бозоридаги соф валюта интервенциялари 6,9 трлн.сўм ёки тахминан 550 млн.доллардан иборат бўлган (Иқтисодиёт ва молия вазирлиги, ФРРУнинг валюта амалиётлари билан бирга). Яъни сотиб олинган олтин ва сотилган валюта ўртасидаги фарқ деярли 1,8 млрд.долларни ташкил этган. Қизиғи, бу фарқлик захираларнинг валюта қисмининг кўпайиши ўлароқ намоён бўлмаган. Йил бошидан буён ишлаб чиқарувчилардан сотиб олинган олтин ва олтин экспорти ҳажми мутаносиблиги сақланмоқда. Марказий банкка кўра, интервенциялар ҳажмининг нисбатан камлиги мавсумий аҳамият касб этиб, иқтисодиётга валюта оқимларининг юқорилиги шароитида ички валюта бозорида етарли таклифнинг шакллангани билан изоҳланади. Етарли таклиф манбалари эса айтилмаган (балки банклар ва давлат компаниялари еврооблигациялари, бошқа ташқи қарз ва кредитлар). Умуман олганида, сотиб олинган олтиндан камроқ интервенция ушбу даврда ортиқча ликвидликни яратган (ликвидлик профицити).