Ташқи қарз Марказий банкка 2023 йил охирида камроқ валюта интервенция қилиш имконини берган Пул бозори ва ликвидлилик шарҳига кўра, Марказий банк 2023 йилнинг 4- чорагида 21,5 трлн.сўмлик олтин харид қилган. Лекин амалга оширилган соф интервенциялар 8,7 трлн.сўм эквивалентини (717 млн.доллар) ташкил этган холос. Шарҳдан англашилича, Ҳукуматнинг даромадлари ва харажатлари ўртасидаги тафовут, асосан, чорак давомида жалб этилган ташқи қарз маблағлари ҳисобидан молиялаштирилган. Яъни, амалда октябрь-декабрь ойларида асосан Иқтисодиёт ва молия вазирлиги Марказий банкдан кўра кўпроқ валюта сотган. Эсингизда бўлса, октябрда 4,25 трлн сўм миқдоридаги яшил суверен халқаро облигациялар ҳамда 660 млн доллар миқдоридаги халқаро облигацияларни жойлаштирганди. Бундан ташқари, декабрда халқаро молия институтларидан, хусусан Жаҳон банкидан 800 млн.доллар қарз олинганди. Шу қарзлар қўшилиб, валюта бозорида Марказий банкнинг камроқ интервенциялари бўлсада, муваққат мувозанат шаклланган бўлиши эҳтимоли юқори.