Камбағаллик чегараси белгиланган вақтда янгиланди Минимал истеъмол харажатлари миқдори 568 минг сўмдан 621 минг сўмгача, 9,3%га оширилди. Статагентлик биринчи марта бу жараённи талабларда белгиланган муддатда, 20 январда эълон қилди. Маълумот учун, ўтган 2023 йилда минимал истеъмол харажатларини янгилаш 6 ойга кечикканди. Минимал истеъмол харажатларининг оширилиши ортидан қатор пенсия ва нафақалар миқдорлари ҳам камида шу суммага етказилиши керак бўлади. Булар: иш стажи тўлиқ бўлмаган чоғдаги пенсияларнинг энг кам миқдори; боқувчисини йўқотганлик пенсияси олувчиларнинг бир нафар меҳнатга қобилиятсиз оила аъзоси учун пенсиянинг энг кам миқдори; боқувчисини йўқотганлик нафақаси олувчиларнинг бир нафар меҳнатга қобилиятсиз оила аъзоси учун нафақа миқдори. Шунингдек, хусусий секторда ишлайдиган аёллар учун "декрет пули" минимал истеъмол харажатларига мос равишда индексация қилиниши керак.