2023 йилда банкларнинг ресурс базасини аҳоли омонатлари тўлдирган 2023 йилда банкларнинг депозит портфели жами 24,9 трлн.сўмга ўсган бўлса, шунинг 23,2 трлн.сўмлик қисми жисмоний шахслардан олинган депозитлардир. Юридик шахсларнинг депозитлари 1,7 трлн.сўмга ўсган, девальвация эффекти ҳисобга олинса, корпоратив депозитлар қолдиғи ўсмаган ҳисоб. Айтиш мумкинки, барча банклар 2023 йилда асосан одамлардан пул олиб, одамларга кредит бериш моделида ишлаган. Депозит йиғишда йилнинг охирги ойи декабрь жуда серҳосил бўлган. Жами депозит портфели 12,2 трлн.сўмга ўсиб (шундан 6,4 трлн.сўми аҳоли омонатлари), 241,7 трлн.сўмга етган (шундан 86,3 трлн.сўми омонатлар). Депозит жамғаришда давлат банкларидан Миллий банк, Асакабанк ва Алоқабанк, хусусийлардан Капиталбанк, ОФБ ва Ипотекабанк ўта фаол бўлишган. 2023 йилда омонат бозорида юз берган яна бир тектоник жараён бу хусусий банкларнинг устунликни давлат банкларидан узил кесил тортиб олиши билан боғлиқ. 2023 йил бошида хусусий банкларга 50,2%и тўғри келган бўлса, йил охирида бу кўрсаткич 56,5%га етган. Депозит портфелида чакана депозитлар устун бўлган банклар сони 5тадан 8тага етган ва уларнинг ҳаммаси хусусий банклар. Тенденция сақланса, 2024 йилда хусусий банклар корпоратив депозит бозоридаги устунликни ҳам давлат банкларидан тўлиқ тортиб олади. Лекин бунинг учун назорати давлат компаниялари ихтиёридаги корпоратив депозитларни жалб қилиш жараёни шаффофлашишда давом этиши керак. Шартли давлат компаниялари депозитларини ёпиқ келишувлар ва алоҳида коррупцион рағбатлар эвазига эмас, очиқ бозорда жойлаштириши зарур. Бундан давлат ҳам (солиқлар ундириш орқали) кўпроқ ютади, бозор иштирокчилари ҳам. Марказий банк ва ҳукумат чакана ва корпоратив депозитлар фоиз ставкалари ўртасидаги 4%гача бўлган фарқ хусусан коррупцион тўловларга оид эканини ҳисобга олган ҳолда бозорни оқартиришнинг янги механизмларини (масалан аукционлар ташкил этиб) таклиф этиши керак бўлади.