Тошкентда халқаро Ўзбекистон-Хитой конференцияси ўз ишини бошлади Марказий Осиё халқаро институти Хитойнинг Ўзбекистондаги элчихонаси билан ҳамкорликда «Ўзбекистон ва Хитой: икки давлат халқлари фаровонлиги йўлида ўзаро манфаатли ҳамкорликни ривожлантириш» мавзусида халқаро конференция ўтказмоқда. Форумда икки давлатнинг етакчи таҳлилий марказлари, вазирлик ва идоралар вакиллари, шунингдек, Хитойнинг Ўзбекистондаги компаниялари раҳбарлари иштирок этади. Унда 23-25 январь кунлари бўлиб ўтган тадбир натижалари муҳокама қилинади: Шавкат Мирзиёевнинг Хитойга давлат ташрифи ва Хитой раиси Си Сзинпин билан музокаралари. Давлат раҳбарлари томонидан имзоланган қўшма баёнотда «янги давр учун ҳар қандай об-ҳаво шароитида, кенг қамровли стратегик шериклик» ўрнатилиши эълон қилинди. Ташрифнинг энг муҳим натижаси олий даражадаги сиёсий мулоқотнинг чуқурлашгани бўлди. Институтга Жавлон Вахобов раҳбар бўлганидан сўнг илк бор катта масштабдаги, минтақавий ҳамкорликка улкан аҳамияти бўлган форум ўтказилмоқда. Тадбир давомида конференция иштирокчилари асосий йўналишларда ўзаро манфаатли ҳамкорликни кенгайтириш ва унинг икки мамлакат ижтимоий-иқтисодий ривожланишига ижобий таъсирини кучайтириш бўйича таклифлар билан чиқади.