​Энергетикларга статистларимиздан қўллов: бензин 1,1%га қимматлаган Статагентлик кўзимизни чиройли рақамлар билан қувонтиришда давом этмоқда. Бутун Ўзбекистон аҳолиси ва бизнеси энергетик муаммолар гирдобида яшаган февраль якунларига кўра ойлик инфляция 0,3%ни ташкил этган. 2016 йилдан буён ҳали бирон марта февраль ойида бундай паст инфляция кузатилмаган эди. Йиллик инфляция 8,35%гача туширилган (бундан пастроғи ШОС саммити учун ёпилган Ўзбекистонда, 2016 йил июнда кўрсатилган). Февраль инфляциясининг асосий юки хизматларга тушган. 0,7%. Озиқ-овқатлар ва ноозиқ-овқатлар 0,2%га қимматлаган холос. Статистикага кўра, муҳим озиқлар бўйича арзончилик бошланган. Хусусан, тухум 1,9%га, сабзи 1,8%га, ёғ 1,1%га, пиёз 1,1%га, картошка 0,9%га, шакар 0,7%га, ун 0,7%га, гўшт 0,4%га, гуруч 0,2%га арзонлаб кетган. Расмийларимизга кўра, бензин 1,1%га қимматлаган холос. Маълумот учун, фақат Тошкентда ва фақат бир неча соат сотиладиган 80 шиптир лақабли бензин февралда монополист шохобчаларида 200 сўмга ёки 2,9%га қимматлаган. Вилоятларда 80 бензин 7500-8000 сўмдан 9500-10 000 сўмгача кўтарилган. Статистларимиз январь ойидаги бензин нархи ошишини ҳам унча сезмай қолишганди (вазни 90%лик 80 бензин 12,4%га ошган ҳолатда статистика 3,4%лик нарх ошишини қайд этган). Ўзи жисмонан йўқ, лекин инфляция вазнига уни сунъий пасайтиришга хизмат қиладиган, лекин киритилаётган метан газ нархлари ўзгармаган.