Ниҳоят масъуллар йўл қурилишида ўзи билганича эмас, экспертларга қулоқ солиб иш қилишни бошлабди Статистика агентлиги Ўзбекистон аҳолисида 4 млндан ортиқ машина борлигини маълум қилганди. Улардан энг кўпи Тошкентга тўғри келади. Қаерга қарама пробка, бақир-чақир қилган ҳайдовчилар, йўлдан ўтолмай қийналаётган пиёдалар, пачоқланган машиналар. Шаҳар кўчаларида тартиб йўқ. Нега асосий эътибор фақат машиналарга қаратилган? Тротуарлар, «зебра» йўлаклар, светофорлар масаласинику, айтмасаям бўлади. Пиёдалар ҳамда жамоат транспорти биринчи ўринга қўйилмас экан, муаммолар катталашгандан катталашиб кетаверади бу аҳволда. Дунёнинг ривожланган мамлакатларида ҳам шаҳар одамлар учун қурилади, машиналар учун эмас. Биз эса муаммонинг ечимини фақат йўл кенгайтириш ва шиширилган нархларда кўприк қуришда кўрамиз, холос. Яқинда Тошкентдаги 2 та чорраҳани қайта лойиҳалаштиришибди. Бунда яна ўша эски хатоларни қайтармасдан, ақлли ва илмий ечимлар қилишганига очиғи ҳайрон қолдим. Бунақасини бизда камдан-кам учратамиз. Чорраҳаларда биринчи устуворлик пиёдалар ва жамоат транспортига берилган. Аққли светофорлар ўрнатилган. Машиналар учун ҳаракат траекторияси қисқартирилган. Натижада чорраҳалардаги ўтказувчанлик даражаси ошган, одамлар учун хавф камайган, кўчалар анча тартибли бўлиб қолган. Энди асосий масала, бундай чорраҳалар сонини янада кўпайтириш, бутун шаҳар бўйлаб ёйиш керак.