Қазишга маблағ сарфи каррасига ошаётгани ҳам газ қазиб олиш қисқаришини тўхтата олгани йўқ 2024 йил февралида 3 710,4 млн.куб газ қазиб олинган. Бу ўтган йилнинг февралига нисбатан 137,5 млн.куб, жорий йилнинг январига нисбатан эса 284,2 млн.куб кам. Қулаш қанчалик кўламли бўлганини тасаввур қилишингиз учун, 2019 йилнинг февралида 4 815,3 млн.куб газ қазиб олинган, яъни 5 йиллик чўкиш ойига 1,1 млрд.кубдан ошган. Газ қазиб олишнинг тўхтамаётган қисқариши газ қудуқларини бурғилашга, уларни таъмирлашга ва геологик қидирув ишларини амалга оширишга юзлаб миллион доллар сарфланаётган ва каррасига ошиб бораётган вазиятда давом этмоқда. Энди қудуқларнинг тез ва чуқур қазилиши эмас, қудуқларнинг қазилиш натижадорлиги ва самарадорлиги сўрайдиган вақт келди-ёв. Ёқилғи энергетикасининг бошқа муҳим ресурслари бўйича ҳам барқарорлашиш кузатилаётгани йўқ. Хусусан, февралда ўзи тубда бўлган ўтган йилнинг февралига нисбатан нефть қазиб олиш 4,8 минг тоннага, бензин ишлаб чиқариш 7,8 минг тоннага қисқарган. Ёмонлашаётган вазиятда шимолдаги Мордорга сунъий қарамликни оширишга бўлган носоғлом уринишлар ўрнини импорт манбаларини диверсификациялаш ҳаракатлари эгаллаши керак. Февралда электр энергияси генерацияси ҳам қисқарган (гарчи 1 кун кўп бўлганига қарамай). 2024 йилнинг февралида 6 426,3 млн.кВт.соат электр энергияси ишлаб чиқарилган, бу 2023 йилнинг кризисли февралидан ҳам 74,3 млн.кВт.соат кам дегани. Қисқариш эски ИЭСлар ҳисобига юз берганми ёки яшил генерация қувватлари ҳисобига, бу тўғрида амалдаги статистикамиздан жавоб олиш қийин.