​Олтин нархлари мутлақ рекордни янгилади, бундан ўзбекистонликларга наф борми? Бир унция олтиннинг нархи 2 230 долларга етди. Бу барча даврлар учун олтин нархининг қайд этилган янги максимуми. Ҳозирги котировкаларга чақилса, Ўзбекистон йилига камида 8 млрд.долларлик олтин ишлаб чиқаради ва сотади. Олтин нархининг прогнозда кўзда тутилган 1 унция учун 1 800 АҚШ долл. нархидан 100 АҚШ долларига кўп бўлиши бюджетга 4,5 трлн.сўм қўшимча даромад беради. Миснинг нархи март ойида тоннасига 8 800-9 100 долларлик юқори коридорда сақланмоқда. Мис нархининг прогнозда кўзда тутилган 1 тоннаси учун 7 800 АҚШ долл.нархидан 500 АҚШ долларига ошиши бюджет тушумларини 940 млрд сўмга ошириши керак. Ўтган йилдан бошлаб Ўзбекистон уран нархлари бўйича ҳам супердаромадларни олишни бошлади. Бир йил аввал уранниннг бир фунти 50 долларга етмасди. Ҳозир 90 доллар атрофида, максимумларда 110 долларгача чиқди. Энг камтар ҳисоб китобларда ҳам 800 млн.долларлик уран сотаётган бўлишимиз мумкин. Лекин асосий уран ишлаб чиқарувчи Навоийуран ДК фаолияти очиқ эмас, унинг моляивий натижаларидан тортиб, бюджетга бераётган тушумларигача. Кейинги йилларда олтин ва миснинг, ўтган йилдан бошлаб ураннинг қулай конъюнктуравий нархларидан самарали фойдаланилдими, ўзи деган савол кўпчиликни қийнайди. Бюджетимиз мувозанатли бўлдими? Савдо баланси-чи? Ёки захираларимиз ошиб қолдими? Қарзларимиз камайдими? Нима бўлгандаям ҳозирча олтинимиз бор, мисимиз бор, уранимиз бор. Буёғига шу 3 асосий ресурсимиздан ўзбекистонликларнинг манфаатдорлиги, қўлдан бой берганимиз газ сингари бўлмаслиги керак. Тамшаниб кўз олаётираётган очкўз олигархларнинг бу соҳаларга яқинлашишига асло йўл қўйиб бўлмайди.