Аввалги Мўйноқ билан ҳозирги Мўйноқни солиштириб бўлмайди “Muynak tour” МЧЖ директори Амина Бекжанова фаолияти ҳақида гапириб, ҳозир Мўйноқ аввалги ҳолатидан бутунлай фарқ қилишини таъкидлади. Унинг сўзларига кўра, бундан бир неча йиллар илгари Қорақалпоғистонда туризм умуман ривожланмаган бўлган. “2017-2018-йилларда Қорақалпоғистон Республикаси Мўйноқ тумани иқтисодиётини ривожлантириш ва аҳолини иш билан таъминлаш бўйича қўшимча чора-тадбирлар тўғрисида”ги президент қарори қабул қилингач Қорақалпоғистонда туризмни ривожлантириш бўйича қатор ишлар амалга оширилди. Мўйноқни ривожлантириш дастурида асосий эътибор сайёҳлик салоҳиятини шакллантириш бўйича чора-тадбирларга қаратилган. “Мўйноққа борганимиз ҳеч қандай овқатланадиган жой, меҳмонхоналар йўқ эди. Ҳудуднинг табиати ўзгача эди. У пайтлар ишбилармонларга бўлган имтиёзлар йўқ эди. Бизларга қўрқманглар, ортингизда президент турибди, деб айтилди”, дейди тадбиркор. У, шунингдек, транспорт ҳам мавжуд бўлмагани сабабли туристларни жалб қилиш имконсиз бўлганини айтиб ўтган. Шундан сўнг туризм салоҳиятини ошириш йўлида тадбиркорларга транспорт олиб келиш бўйича имтиёзлар тақдим этилган. Бугунги кунда Қорақалпоғистоннинг ўзига хос экологик шароити, ҳудудда жойлашган табиий обектлар, жумладан Қуйи-Амударё давлат биосфера резервати, Судоче кўли, Ақчакўл кўли, Орол денгизи ва Устюрт текислиги мавжудлиги учун ташриф буюрувчи меҳмонлар кундан кунга кўпаймоқда. Чўл ҳудуд бўлишига қарамай туризм салоҳияти ортиб бормоқда.