Рақобат кун сўзига айланди, бизга рақобат йили, рақобат ўнйилликлари керак Давлат раҳбарининг бизнес билан йиллик анъанавий учрашувида энг кўп урғу берилган, қайта ва қайта такрорланган сўзлардан бири рақобат калимаси бўлди. Аввалги учрашувлардан фарқли равишда имтиёзлар тарқатилмади, преференциялар ваъда қилинмади. Сифат жиҳатдан янгича диалогнинг, соғлом ва конструктив мулоқотнинг гувоҳи бўлдик. Тенг рақобат муҳитини яратиш, ташқи бозорларга чиқиш имкониятларини кенгайтириш алоҳида устувор принцип ўлароқ эълон қилинди. Янграган тезисларга эътибор қилинг: "Жаҳон савдо ташкилотига 2026 йилда аъзо бўлиш бўйича катта қадамлар қўйилмоқда". "Эртанги кунимиз – бу тенг рақобат муҳити ва экспортга қаратилган саноат ва савдо сиёсати". "Корпоратив харидларда ишлаб чиқариш учун олинадиган маҳсулотларга ҳам нарх устуворлиги бекор қилинади". "Бундан буён, ҳеч кимда алоҳида ҳуқуқ бўлмаслиги, хоҳ давлат стратегик корхонаси бўлсин, хоҳ хусусий корхона ёки хорижий инвестор бўлсин, иқтисодиётда барча тенг шароитда ишлаши керак". Иқтисодий ўсишнинг давом этиши ва инклюзивлиги, даромадларнинг кенгайиши ва кўпайиши рақобат ва тенг ишлайдиган қоидаларсиз имконсиз эканига жиддий ишоралар берилди. Бизга мақсадларга эришиш учун ҳали рақобат йили, рақобат ўнйилликлари керак.