​Қуёш панеллари ва энерготежамкор қозонлар импорти учун сунъий чекловлар бекор бўладими? Кечаги йиғилишда Давлат раҳбари муқобил энергия манбаларини ўрнатишни давлат сиёсати деб атади. Хусусан, 1 млн хонадоннинг иситиш тизимини энергия тежамкорига алмаштириш, аҳоли ва тадбиркорларга 973 МВт қувватли қайта тикланадиган энергия манбаларини ўрнатиш вазифаси қўйилди. Агар адашмасам, охирги икки ҳафта энерготежамкорлик борасида иккинчи марта йиғилиш ўтказилди. Йиғилишдан кейин энергетикадаги раҳбарлардан бир нечтаси муаммолар айтилмайдиган Ўзбекистон 24 учун интервью ҳам берди. Дарҳақиқат бу интервьюларда умумий гаплар ва ҳамду санолардан бошқа бирон жиддий янги гап ё таклифни эшитмайсиз. Масалан, қуёш панелларининг божсиз импорти ёпиқ қарор билан фақат 2 та компанияга топширилгани, қолганлар бож ва нобож тўсиқлардан ўтиши лозимлиги, табиийки, сунъий монополлашган муҳитда қуёш панелларининг нархи потираб ўсишдан тўхтамаётгани, панелларни ўрнатишга рағбатни ўлдираётгани ҳақида лом-лим дейилгани йўқ. Балки қуёш панеллари импорти бўйича ёпиқ қарор билан имтиёз берилган компанияларнинг шонли энергетикларнинг ўзларига тааллуқли жойи бордир? Балки шунинг учун қуёш панелларини ўрнатишга мажбурлашнинг илдизи ва сабаблари шонли энергетикларнинг ўзларига қараб етаклар? Шу билан бирга, 1 млн хонадоннинг иситиш тизимини энергия тежамкорига алмаштириш бўйича вазифа қўйилганида, нега шонли энергетиклар масалан, иситиш қозонлари учун аждарҳо божлари ва сертификатлашдан тортиб, мажбурий тестларгача бўлган нобож чекловлар ҳақида муаммони кўтаришмади? Ўзи мақсад энерготежамкорликми ёки шу баҳона иситиш қозонларини "маҳаллийлаштириб олган" олигархларга 1 миллионлик буюртма яратиб беришми? Нега бу бўйича энг тўғри йўл эркин танлов яратиш экани ҳақида эслашмайди? Нега "маҳаллийлаштирилган" икки контурли қозон импорт аналогидан ҳам қиммат, ҳам сифатсиз? Энергетикларнинг олд қатордаги устозлари ёки орқа қатордаги садоқатли шогирдлари бунга нима дейди?