Пластикка ўтказилаётган пенсиялар ҳақида-2 Пенсия тўловларини пластик карталар орқали пенсионерларга етказиш керакми? Албатта шундай қилиш лозим ва лобуд. Бу уйма-уй юриб нақдлик тарқатишдан кўра самарали, арзон, афзал ва айниқса карантин даврида энг зарурий технологик чора. Лекин ҳатто энг эзгу ғоялар ҳам нопрофессионаллар қўлида бузғунчи ҳаракатга айланиб кетади. Қандай қилиб бунинг олдини олиш мумкин? Бунинг учун аввало амалдаги нормативларни мувофиқлаштириб олайлик, барака топгурлар, ҳарқалай ҳуқуқий давлат қураяпмиз, дея ҳайқириб ётибмиз. Иккинчидан, пенсия муносабатлари ва пенсияни тарқатиш регуляторнинг эмас, Пенсия жамғармаси ва у танлаган агентларнинг вазифаси эканини унутмайлик. Ҳамма ўз ишини бажарсин! Мен шу жамғармага бадал тўлаяпман, отахон ва онахонларимиз шу жамғармага йиллар давомида ажратма йўналтириб келган. Пенсия муносабатлари пенсионер ва пенсия жамғармаси ўртасида юз бериши лозим. Учинчидан, нега нормал давлатлар юрган йўлдан эмас, саводсизларча энг аҳмоқона, энг қақач, энг сифатсиз йўлни танлаймиз ва буни ўз йўлимиз дея улуғлаймиз? Нега агент сифатида бусиз ҳам сифати ва технологик аҳволи ва имкониятлари маълум бўлган Халқ банки танланган? Нега Пенсия жамғармаси пойтахт, вилоят марказлари ва Нукус шаҳрида пенсия тарқатиш бўйича агентларни аниқлаш учун 14та алоҳида Лот ташкил этиб, 14та очиқ аукцион эълон қилмади. Шунда масалан Халқ банки фақат 2та Лотда ютиб чиқарди холос. Юклама бошқа ғолиб банкларга ҳам тақсимланарди. Ҳали олдинда туманлардаги пенсионерлар турипти. Кулфат кўламини тасаввур этаяпсизми? Тўртинчидан, энди пенсионерлар ўзлари мустақил равишда банк танлаши ва танланган банкларда пенсия учун карталар очиши мумкинлиги айтилаяпти. Идеалда бу тўғри, лекин бизнинг номукаммаллик устига қурилган серқуёшимизда эмас. Шунча хатолар кетма-кетлиги ва хаосдан кейин. пенсионерларга ўз ихтиёри билан банк ва ихтиёрий карта танлаш ва Пенсия жамғармасига картаси тўғрисидаги маълумотларни осон йўл билан юбориш мумкинлигига сиз ишонасизми? Мен шахсан ишонмайман. Яна банклар туманларга, шаҳарларга ихтиёрий-мажбурий бириктирилади. Ҳеч қандай танлов ва аукционларсиз. Бундан аввал эса кичик-кичик муаммолар яратилади. Масалан, пенсионерларнинг ўзлари мустақил танлаган банки ва очган карталарига пенсия бориб тушмайди. Қарабсизки, чиновниклар учун пенсияга масъул банкларни бириктириш ва мажбурлаш учун баҳона тайёр бўлади. Яна эски ҳаммом, эски тос бўлади. 2017 йил бошида етиб келган жойимизга етиб борамиз. Нима қилмоқ керак? Шундай қилмоқ керакки, банклар пенсия тарқатиш ва пенсионерлардан кулфат ва бошоғриқдек қочмаслиги лозим. Шундай бозор механизми ишга тушиши лозимки, унда Пенсия жамғармаси маблағлари ва пенсионерлар гуруҳларига эга бўлиш учун, жамғарма агентига айланиш учун банклар даромадли мижозга курашгандек курашиши зарур. Давоми бор. @the_bakiroo