Энергетика ёлғонлари янги ёлғонларни яратади "Намангандан ёзяпман. Туманимиздаги газ-заправкалар қуёш панели ўрнатмагани учун газдан узилибди. Фақат битта заправка ишлаяпти, турнақатор навбат. Энди, қиммат бўлса ҳам, бензин қуйяпмиз. Кеча Энергетика вазирлиги: “Ҳеч ким қуёш панели қўйишга мажбурланмаяпти”, деб чиқди-ку, тавба. Халқ аҳмоқ эмас. Ҳамма кўриб, билиб турибди асл вазиятни. Мажбурланмаган оддий халқ қолди, холос”. Муҳримбойга ёзаётган муштарий шонли энергетикларга арз қила олмайди. Унинг номини ҳам кўрсатиш бало қазога рўпара қилиш дегани. Газни узиш ҳолва, заправканинг лицензиясини ҳам тортволишади. Шунинг учун ҳам энергозўравонликка қарши туриш учун бошқа, мустақил мурожаат канали керак. Кеча камбағал бириктирилган бир тадбиркор камбағалнинг хонадонига 5 кВтли қуёш панели ўрнатишга тўғри келаётгани, лекин ўша уйга панел ўрнатиш тугул, мих қоқса ағдарилиб кетиши мумкинлиги ҳақида уйнинг суратини қўйиб, твит ёздим. Кейин ўчирдим, тадбиркорнинг ўзининг сўрови билан. Чунки ҳокимни кўзи тушса, тадбиркорни бир балога рўпара қилдириши аниқ. "Мажбурлаганларни оқла, мажбурлаш ҳақида шикоят қилган ва ахборот тарқатганни жазола", деган методичка аллақачон ишга тушган.