Қуёш панели ўрнатишга мажбурлаш бўйича ишончли тескари алоқа керак Бўлмаса, "Қуёш панели ўрнатишга мажбурлаш йўқ", деган худди ўтган эпохадаги каби "болалар пахтага чиқмаяпти" қабилидаги шаблон жавоблар такрорланаверади. Шунинг учун бизга ишончли тескари алоқа керак. Ботми, ишонч телефоними ёки шикоят қолдириладиган онлайн платформами. Фақат бу алоқани энергетикларга ёки ҳокимиятларга эмас, мустақил идорага, масалан, Рақобат қўмитасига топшириш маънога эга бўлади. Эчки шикоят қилса, унинг шикоятини қассобга топшириш керак эмаску. Қуёш панеллари ва уларни ўрнатишнинг ўтган йилги мажбурлаш компанияси пайтида 18-20 млн.сўмга чиқиб кетган нархи кейин анча арзонлашиб қолгани бор гап. Лекин бу маълумот мажбурлаш кампанияси қайтадан бошлангандан кейин яна эскирди. Шунинг учун, Энергетика вазирлиги 9 млн.сўмлик “off grid” тизимидаги қуёш панелларини қайси ташкилотлар ўрнатаётгани тўғрисидаги батафсил ахборотни вилоятлар ва туманлар қирқимида сайтигами, телеграм каналигами жойлаб қўйса ва янгилаб борса бўларди. Чунки ҳудудларда 9 млн.дейилган панеллар шу кунларда 14-16 млн.дан арзонига таклиф этилаётгани йўқ. Дарвоқе, панеллар импортини қандайдир 1-2 та ташкилот рухсат орқали амалга оширмоқда, деган гапни бирон бир "иқтисодчи" айтгани йўқ. Ҳа, юздан ортиқ компания (уларнинг мутлақ кўпчилиги ўз эҳтиёжлари учун) панел импорт қилган. Гап уларнинг орасида кимларнингдир танасига яқин фақат иккита ташкилот панел ва унинг эҳтиёт қисмларини божсиз олиб кираётганида, имкониятлар нотенглигида. Имтиёз ё ҳаммага бўлиши ёки ҳеч кимга бўлмаслиги зарур.