Энергетиклар гаровида қолган ўзбек бизнесининг фиғонларини ким эшитади? Spot нашри электр энергияси таъминотидаги авария ва узилишлар, қуёш панеллари ўрнатишга мажбурлашларнинг етказаётган зиёни борасида қатор таниқли тадбиркорлар билан гаплашган. Эътибор беринг, бу тадбиркорлар исталганча босим ўтказиш мумкин бўлган Бойсундаги кичик дўкон, Мўйноқдаги дорихона ёки Марҳаматдаги ўқув маркази эгаси эмас, бутун Ўзбекистон танийдиган, маркаси, бренди, миллиардлаб капитали, юзлаб ишчиси бор бизнесменлар. Хусусан, «ЧайКоф», Maqom Bar ва «Молоко» кафеси бошқарувчиси Алина Цимерман ҳар кунги свет ўчишлар, ўчмаган ҳолатда ҳам ускуналар ишламай қоладиган даражадаги паст кучланишлардан ҳикоя қилади. Fratelli Casa ва Uzbtextile ҳаммуассиси Шоҳруҳ Қаюмов қуёш панели ўрнатишга мажбурлашлар ортидан электр таъминотини огоҳлантиришсиз узиб қўйишлар ва бу ишлаб чиқаришни, буюртмаларни тўхтаб қолишига сабаб бўлаётганига эътибор қаратган. M Cosmetic ўзи биринчи қаватларда ижарадаги ўтирган ва бино томига "кириш ва эгалик имкони йўқ" сотув маконларида қаерга ва қандай қилиб қуёш панели ўрнатиш керак деган мантиқий савол берган (бу панелга мажбурланаётган ижарадаги ўн минглаб тадбиркорларнинг шу кунлардаги бош оғриғи). Бизнес вакиллари яна олдиндан 100% тўловнинг тенг имкониятлар яратмаслиги, узилишлар учун электр таъминоти корхоналари учун моддий жарима ва жавобгарликнинг йўқлигидан ҳам ёзғиришган.