Оруэлл ҳам хом чайнаб қолади: қуёш панели ўрнатишга "мажбурлаш йўқ", лекин панел ўрнатмаганларнинг светини ўчириш бор Шонли энергетиклар Оруэлл антиутопиялари қаҳрамонларигаям дарс беришган бўларди. Эсингиздами, бир ҳафта аввал Энергетика вазирлиги "Қуёш панели ўрнатишга мажбурлаш йўқ" дейилган кулгули баёнот билан чиққан эди. Сирдарёда қуёш панели ўрнатмагани учун тадбиркорларнинг светини узишган, тадбиркорлар эса ҳокимият биноси олдига тўплангандан кейин, энергетиклар айбини тан олишган. Ҳаммадан қизиғи, қуёш панелига ўрнатишга мажбурлаш учун асос дея айтилаётган ўша 222-қарорни ҳали ҳеч ким кўрмаган. Қарор ё махфий ё ёпиқ. Дарвоқе, қуёш панелига мажбурлаш ҳолатлари бўйича ЎзЛиДеП ўз депутатлари орқали тегишли вазирлик ва идораларга депутатлик сўровлари билан мурожаат қилиши ва бундай ҳаракатларга ҳуқуқий баҳо беришни қатъий талаб қилишини эълон қилганди. Хўш, ҳукумат тузган ўзлибераллар ҳукуматдагиларга мурожаат қилишдими? Мажбурлашларга қанақадир ҳуқуқий баҳо олиндими? Ё бу сайлов-палов кампаниясининг навбатдаги шовқинли ёлғонимиди?