Пропан бўйича антибозор чоралари Ўзбекнефтегазнинг ўзи оғир аҳволини янада оғирлаштиради Энергетика вазирлигининг тақсимотига асосан, Ўзбекнефтегаз АЖ ишлаб чиқарган пропан ҳажми биржага чиқарилмайди ва деярли тўлиқ аҳоли эҳтиёжлари учун йўналтирилади. Хўп, нима бўпти, яхшику аҳолига берса дейишга шошилманг. Гап шундаки, аҳолига бериладиган пропан ишлаб чиқарувчилардан 3 500 сўмдан сотиб олинади ва аҳолига 1 600 сўмдан сотилади (салбий фарқи бюджетдан субсидия билан ёпилади). Ўзбекнефтегаз (Шўртан ва Муборак заводлари) 3 500 сўмдан пропан бераётган бир вақтда бошқа "хусусий" ва "хорижий" компаниялар ишлаб чиқарган пропанни биржада камида 8 500 сўмдан сотишади. Масалан, жума куни Энергетика вазирлиги киритган чекловларга қарамай, LUKOIL Overseas Supply and Trading бир неча юз тонна пропанни биржада камида 8 500 сўмдан сота олган. Яъни, бир кун ўтмасдан киритилган чекловларга нисбатан истиснолар бошланган. Лекин истиснолар фақат шимолликларга боғланган компанияларга берилган. Буям майли. Аҳолига пропан сотиш мажбурияти рўйхатига севимли Saneg умуман киритилмаган. Яъни, Saneg назоратидаги пропан аҳолига берилмайди, тўлиқ биржада сотилади. Бундай қийшиқ қарорлар ва истиснолар йилдан йилга аҳволи оғирлашаётган Ўзбекнефтегазнинг молиявий аҳволини янада оғирлаштиради. Ўзи охирги 3 йилда газ қазиб олишнинг энг катта қисқариши Ўзбекнефтегаз конларига тўғри келган. Қўшимчасига, Ўзбекнефтегаз томонидан қазиб олинаётган газ энг арзон нархда UzGasTrade'га сотилса, қолганларнинг сотув нархи ҳалигача махфий ва эҳтимолки, ҳатто импорт газидан ҳам қиммат (буни вазир Мирзамаҳмудов яна бир бор очиқлашни истамаганига Lolazor'нинг охирги сонида ўзингиз гувоҳ бўлгандирсиз). Шунақа тасаввур уйғонмоқдаки, Ўзбекнефтегаз бўйнига самарасиз лойиҳалар учун қарз ва мажбуриятларни илиб, каррасига қиммат пудратлар билан бор молиявий ресурсларини суғуриб олиб, қўшимчасига, маҳсулотларини энг арзон нархда сотиб олиб, банкротлик ёқасига олиб келишмоқчи. Шунда охирги 8 йилда Ўзбекнефтегаз кон, ҳуқуқ ва активларини ўз номига ўтказиб олаётган "инвесторлар" қачонлардир Ўзбекистоннинг энг катта компанияси ва солиқ тўловчисининг қолган актив ва конлариниям сувтекинга эгаллаб олиши мумкин бўлади.