​Расмийларнинг мониторинги: Бир йил давомида гўшт нархи ўзгармаган Иқтисодиёт ва молия вазирлиги пойтахтнинг улгуржи бозорларидаги қишлоқ хўжалиги маҳсулотлари кунлик нархларини қайтадан беришни бошлаганига бир йил бўлди (эрта ва индин дам олиш кунлари маълумотлар берилмайди). Биз 2023 йил 13 октябрь ва 2024 йил 11 октябрдаги нархларни солиштириб кўрдик. Айтиш керакки, бу вақт оралиғида Тошкентнинг рамзларидан бўлган машҳур Қўйлик улгуржи бозори олигархпарвар ва шотир амалдорлар томонидан реконструкция баҳона аввалига ёпилди, кейин эса бузилиб, тугатилди. Бозорчилар ва тадбиркорлар қишнинг қоқ ўртасида ҳеч бир компенсациясиз мажбурий равишда Food city'га кўчирилди. Шундай қилиб, агар расмийларга ишонсак, максимал нархлар солиштирилса, ўтган 1 йилда пойтахтда гўштнинг нархи ўзгармай қолган (расмий статистика бўйича ҳам 12%дан кўпга қимматлаган). Йил давомида энг кўп қимматлаган қишлоқ хўжалиги маҳсулоти бу булғор қалампири (7,5 баробарига ошган). Шунингдек, ўтган йилнинг шу даврига нисбатан помидор деярли 3 карра, бодринг 2 каррадан кўпга қимматлагани эътиборли. Қуйидаги суратда нархи инфляциядан тезроқ ошган маҳсулотлар қизил рангда келтирилган. Яна бир жиҳатга диққат қилинг. Импорт мевалар ё арзонлашган ёки инфляциядан паст даражада қимматлаган. Учта маҳсулот — турп, анор ва беҳининг нархлари эълон қилиниши тўхтатилган.