Даққисоветлардан қолган "5 кунлик 8°С" қоидасини бекор қилишга нима ҳалақит қилади? Марказий иситиш қачон ёқилади деган саволга, ўзбек чиновникларидан тортиб, оператор Veolia'гача навбатчи жавоб тайин: "Иситиш даври ташқи ҳавонинг ўртача суткалик ҳарорати 8° С дан паст бўлган 5 кунлик давр тамом бўлган кундан кейинги кундан бошланади". Лекин бу аксилинсоний қоидалар одам одам ўрнида кўрилмаган советлар пайтида ўрнатилган. Ишонмасангиз, мана солиштириб кўринг: Бу совет мустамлакаси даври қоидалари. Бу Ўзбекистон қоидалари. Совет босқинчилари Москва ва Ленинграддан туриб қандай ёзишган бўлса, ўзбек чиновниклари миллий иқлим хусусиятларини инобатга олмай, шундоқ кўчиришган. Энди, об-ҳавога қараймиз. гарчи эртага тунги ҳароратлар минусга тушса ҳам, уч кундан кейин яна ҳаво ҳарорати кўтарилади. Яъни "отопление" ишга тушиши учун "5 кунлик 8°С" қоидаси талаблари юз бермайди. Ер музлайдиган жорий ҳафтани қўйинг, агар даққисоветлардан қолган қоидаларга қаралса, 10 ноябргача ҳам иситиш ёқилмайди. Янаям ғалати жойини айтайми? Ўзбек чиновниклари охирги 3 йилда бу қоидаларга қараб ҳам ўтирмай, иситишни ёқишган. 2021 йил 14 октябрдан, 2022 йил 24 октябрдан ва 2023 йил 6 ноябрдан иссиқлик таъминоти узатилиш мавсуми бошланган. Лекин шу саналар атрофида кетма-кет 5 кун ҳарорат 8 даражадан пастга тушмаган. Яъни, иситишни ёқишга одамхўр советларнинг нормалари эмас, тошкентликларнинг талаблари ва бу талабларга қулоқ солиш асос бўлган. Бошқача айтганда, қарор қабул қилишда халқ субъект ҳисобланган. Қизиқ, 2024 йилдан бошлаб халқ субъект эмасми, энди. Буям майли, даққисоветлардан қолган "5 кунлик 8°С" қоидасини бекор қилишга нима ҳалақит қилади? Қайсидир ўғри олигарх фойдаси учун 3 соатда қарор қабул қилувчилар наҳотки халқ манфаатига келганда жим туришни маъқул кўришади. Гап пулдами? Гап пулда бўлса, ўтган йили бюджет аҳволи бу йилдагидан ёмонроқ эдику? Ёки кейинчалик балки катта қисми олигархия чўнтаги учун экспортга кетаётган газ импорти учун бюджет субсидияси шақиллатиб берилаяптику.