Пропан учун потолок спред ўрнатилган ва нархлар ниҳоят пасайган Рақобат қўмитаси биржага чиқарилаётган пропан учун бошланғич нархга нисбатан 20%лик спред ўрнатган. Бу ҳақда Spot хабар бермоқда. Рақобат қўмитасидан узоқ кутилган мазкур дадил қадам дарҳол нархларга таъсир ўтказган. Кеча пропаннинг ўртача нархлари тоннасига 1,2 млн. сўмдан кўпроққа пасайган ва 8,9 млн.сўмгача тушган. Бу бозорга қарши ҳаракат эмас. Бу бозор йўқлигида, бир тўда олигархлар ва монополистларнинг ўзбошимчалигига қарши фавқулодда, лекин вақтинча чора сифатида кўрилиши керак. Бир қўлли қилинган пропан бозорига шонли энергетиклар тўдасига алоқадор бўлмаган янги мустақил ўйинчилар киритилиши ва нафақат ишлаб чиқарувчилар, ўзаро аффилланган импортчиларга нисбатан ҳам антимонопол чоралар қўлланилиши лозим. Бундан ташқари биржадаги битимларнинг ҳақиқатда амалга оширилаётганини чуқурроқ ўрганиш керак бўлади. Чунки манипуляциялар нафақат сотувчилар, сотувчилар билан тил бириктирган айрим харидорлар иштирокида ҳам рўй бераётгани белгилари бор.