“Трастбанк” ва Хусусий секторни ривожлантириш бўйича Ислом корпорацияси 30 миллион долларлик битимни имзолади “Трастбанк” ва ХСРИК ўртасида 30 миллион АҚШ доллари миқдоридаги битим имзоланди. Айтилишича, бу маблағлар Ўзбекистонда кичик ва ўрта бизнес лойиҳаларини шариат қоидаларига мувофиқ молиялаштиришга йўналтирилади. Шу тариқа мамлакатда тадбиркорлик субъектларини қўллаб-қувватлаш ва янги лойиҳаларни амалга ошириш имкониятлари кенгайиши кутиляпти. Уларнинг ҳамкорлиги 2018 йилда бошланган, ҳозиргача корпорация томонидан ажратилган маблағларнинг умумий ҳажми 37 млн долларни ташкил қилади. Бундан ташқари, банкнинг ХСРИК ва Халқаро ислом савдо-молия корпорацияси билан имзолаган келишувлари асосида 97 та лойиҳа молиялаштирилган. Маълум қилинишича, лойиҳалар текстиль, фармацевтика, умумий овқатланиш, хизмат кўрсатиш ва электромобиллар савдоси каби соҳаларни қамраб олган. Бундай молиялаштириш мамлакатда иш ўринлари яратилиши ва тадбиркорликнинг кенгайишига ҳисса қўшяпти. Бунда асосий эътибор кичик ва ўрта бизнес субъектларининг иқтисодиётдаги фаоллигини оширишга қаратилган. Ажратилган маблағларнинг шариат қоидаларига тўғри келадиган турли соҳаларга йўналтирилиши ишлаб чиқариш ва хизмат кўрсатиш тармоқларини ривожлантиришда муҳим роль ўйнаётгани айтиляпти.