Ўзбекистон ва Хитой ўртасида визасиз режим жорий қилинадими? Тармоқларда Ўзбекистон ва Хитой визасиз режим ўрнатиши ҳақида хабарлар айланмоқда. Маълумот учун, Хитой фуқароларига (хусусан, Гонконг ва Макаоликларга) Ўзбекистонга 10 кунлик визасиз режим 2021 йилдан буён ишламоқда. Лекин Хитой томони ўзбекистонликларга нисбатан виза режимини сақлаб қолмоқда. Назаримизда тармоқлардаги хабарларга Дунё агентлигининг мана бу ахбороти сабаб бўлган бўлииши мумкин. Унда Хитой Ташқи ишлар вазирлиги Консуллик департаментида учрашувлар ўтказган Ўзбекистон элчихонаси дипломатлари "хорижий давлатлар билан виза тартибини янада эркинлаштириш, хусусан, виза талабларидан ўзаро озод этиш тўғрисида келишувларга эришиш" муҳимлиги ҳақида гапиришган. Бирон бир битим ё дастлабки аҳдлашув ҳақида гап бормаган. Хитойга визасиз режим очилиши ҳақида вақти-вақти билан сиздиргилар пайдо бўлаётганига қарамай, ҳалигача амалий қадамларга ўтилмаган. Доим ўзимизни солиштирадиганимиз Қозоғистонликлар учун Хитойга, Хитойликлар учун Қозоғистонга 30 кунлик визасиз режим ўтган йили жорий қилинган. Шу билан бирга томонларнинг фуқаролари 180 кун ичида кўпи билан 90 кун визасиз юриши мумкин бўлади.