​Уй-жой нархининг ўсиши секинлашишда давом этмоқда 2024 йилда кўчмас мулк нархи Ўзбекистон бўйича бирламчи бозорда сўмда 11,4%га, иккиламчи бозорда эса 6,7%га қимматлаган. Солиштириш учун 2023 йилда бирламчи бозордаги нархларнинг йиллик ўсиши сўмда 39,6%, иккиламчи бозорда эса 35,1%ни ташкил этган эди. Бошқача айтганда 2022 йилда бошланган ва 2023 йилда қизиб кетган нархларнинг кескин ўсиши мўътадиллашиб, секинлашган ва инфляция даражаси атрофида бўлган. Кўчмас мулк инвестиция сифатида кўриладиган Тошкент шаҳрида иккиламчи бозорда ўртача нархлар сўмда 2,5%га ошган холос. Доллар индексида нархлар квадратига 1200 доллардан пастга тушган. Қизиғи, 2024 йилда Тошкентда ер нархи ҳам пасайган ва сотихи ўртача 352 млн.сўмдан иборат бўлган (ўтган йили 362 млн.сўм). Мазкур тенденция пойтахт ҳудудининг янги Тошкент ҳисобига кенгайиб бораётгани ва нисбатан арзон ерлар ўртачага таъсир этаётгани бўлиши мумкин. Анъанавий ва айниқса марказий Тошкент ҳудудида ер нархи ошишда давом этмоқда. Прогноз қилинганидек, паст база эффекти ҳисобига вилоятларда нарх тезроқ ўсмоқда. Тошкент билан нархлардаги фарқ катталашиб бораётгани, экология ва инфратузилма имкониятлари ҳисобга олинса, яқин йилларда Фарғона ва Сирдарёда кўчмас мулк хариди нисбатан жозибали бўлиши мумкин.