Ер нархи уй нархидан тезроқ ўсмоқдами? Марказий банк 2023 йил якунларига кўра Кўчмас мулк бозори шарҳини тақдим этмоқда. Регулятор таҳлилларига кўра, иккиламчи бозорда нархларнинг йиллик ўсиши суръати энг юқори даражага, сўмда 38%га, долларда эса 25,4%га октябрь ойида чиққан. Шундан кейин йиллик ўсиш кўрсаткичи пасайишни бошлаган. 2023 йил якунларига кўра, сўмдаги ўсиш 35,1%ни, доллардаги ўсиш 23,0%ни ташкил этган. Яна бир жуда қизиқ боғлиқлик Ипотека кредити ажратиш суръатига оид. Ипотека кредитларининг ажратилиши тезлашиши иккиламчи бозорда уй-жой нархларининг ошиши тезлашишига олиб келганлигини кўриш мумкин. Бирламчи бозорда нархларнинг ўсиши тезлиги тўхтамай ортиб бормоқда. 2023 йил давомида бирламчи бозордаги нархларнинг йиллик ўсиши сўмда 39,6%, долларда 26,9%дан иборат бўлган. Аҳоли умумий даромадларининг ўсиши уй-жой нархларининг ўсишидан 2 баробардан зиёдга ортда қолмоқда. 2023 йилда аҳолининг умумий даромадлари ва уй-жой нархлари ўсиши ўртасидаги фарқ 20%дан ошган. Ўтган йили бу фарқ 4,4%ни ташкил этганди. Пуфакнинг шишиши иккинчи йил ҳам давом этган, нафақат давом этган, тезлашган ҳам. Тошкент шаҳридаги уй-жой нархи ўртача квадрати 1200 доллардан ошган. Нархлар бўйича Чимкент қувиб ўтилди. Энди олдинда Астана ва Алмати қолди. Тошкентда бир сотих ернинг ўртача нархи йил давомида 263 млн.сўмдан 362 млн.сўмгача қимматлаган (+38%).